NOTTATA  GEJUSANA

'A luna 'nchjan'accittu d'a Marina

e crisci 'nt'a 'sta notti, alleggiamenti,

'i quant'ajuci pari ch'è matina,

e non ti duna cor'u t'addormenti.

E' tuttu jornu sup'i giaramidi,

ma 'n giru no' nci sunnu cchjù perzuni,

aundi posi l'occhji sulu vidi,

i grasti e li cortari d'i barcuni.

'Na gatta dormi sup'a 'nu scaluni,

'na líndaneja vola, joculana,

'na buffa sarta sarta 'nt'o vajuni:

è propju 'na nottata gejusana!

Chi paci! Esti daveru 'na majía!

No 'nc'è 'nu fil'i ventu chi si senti

sugn'affacciatu d'a finestra mia

e 'a vita chi passáu mi ven'a menti.

 Pe' mmia furu canzuni 'ji nottati,

non criju ca m'i pozzu cchjù scordari:

'a vuci si sentía d'i serenati

e, di luntanu, 'a musica d'u mari.

'I 'na singazza 'i porta si vidía

'na lumereja c'ajucía ddu' mani:

era zziama Tiresa chi tessía

appuramenti chi 'mpastav'o pani.

Tandu 'nc'era rispett'e amurusanza,

'a genti si nutría d'amur'e pani;

oji no' nc'esti cchjù bbona crijanza

c'a genti mo s'ammazza com'i cani.

 'A vita d'oji è fatta di doluri,

'i guerri, terrorismu ed attentati;

orma' simu 'nt'e mani d'u Signuri,

c'amuri no' nc'è cchjù mancu tra frati.

'A luna 'nchjan'accittu d'a Marina…

ma e' n'a viju, forzi si 'ndi jíu?

V'o vi' ca 'ntisi aria 'i "cuccurina"

e p'a cacazza, amara, s'a fujíu?

'A GRAZIA
('U cumpriannu d'u 'ndicappatu)

 
 
Mi guardi comu fussi 'mpasimatu,
c'a vucc'aperta e l'occhji sbijicati,
vorriss'u parri ma non ha' rihjatu,
arret'a lastra passi li jornati.
 
Sup'a 'sta seggia 'i ferru si' jettatu,
com'a 'n'ahhjeri, senza umanitati,
'a sorti vozz'u nesci, tu, malatu
nomm'u ti po' godiri 'a libertati.
 
Tu nd'ha' pe' cruci la malasaluti
ed eu, pe' malanova, 'a povertati;
restamma tutt'i ddu' menzi schjumputi,
'nt'a chisti mura vecchji e sdarrupàti.
 
Oji su' diciott'anni chi nescisti
e chi 'nt'a casa gioia mi portasti;
'a mamma, figghju, tu n'a canuscisti
ca si ndi jìu appena tu bramasti.

 A ttia, chi maggiorenni mo diventi,
vorrìa 'm'u ti rigalu la saluti,
ma puru c'o porrìa non serv'a nnenti:
pe ttìa puru li chjanti su' perduti.
 
Allura non vorrissi pemmu 'mbiti
l'amici tutti quant'i 'sti ripati,
pemmu mangiati e 'mu vi divertiti
e 'm'abballati fin'e matinati?
 
Arzat'i jocu! Va'! Chjama i parenti!
'Mbita l'amici e cogghji li cotrari,
puru ca pe' mangiari no' nc'è nnenti,
nc'è semp'u modu 'm'u si po' brindari.
 
Pe' torta misi, 'nt'a 'na 'nzalatera,
pan'ammojatu e d'acqua ddu' cannati;
pe' candileji misi la lumera
e l'umbri nosti sunnu li 'mbitati.
 
Hjùhhja cca supa, figghju, e sta' sicuru,
stuta 'sta luci chi ndi detti Ddeu,
non faci nenti ca restam'o scuru,
ca fumma semp'all'umbra tu ed eu.
 
Mi ven'a vogghja 'mu mi scipp'u cori!
- Perdunami, Signuri, si mi senti! -
Non era megghju l'omu pemm'u mori,
ca pemm'u campa e nommu servi nenti?
 
Pecchì calast'i vrazza, mo, sì stancu?
Risbìgghjati ch'è ura 'm'u mangiamu...
E mo chi nda'?... Tu diventasti jancu...
Aspetta ca mo jam'e ndi curcamu.
 
Mi guardi comu fussi 'mpasimatu,
c'a vucc'aperta e l'occhji sbijicati,
vorriss'u parri ma non h'ha' rihjatu,
scurar'orma' pe ttia tutt'i jornati!...
 

 
'A  NACA

D'i cosi chi vitt’eu ’nt’a cotraranza
nc’é una chi ’nt’o cori mi restáu:
’a naca ch’era ’mpisa ’nt’a ’ja stanza
aundi mama, amara, m’ajattáu.

’A casa vecchja, aundi éu stacía,
non era casa ricca ’i benestanti;
era minuta, ma pe’ mmía valía
quantu ’na pisa d’oru e di brillanti

Jan’inta nu’ passamma li jornati,
’nt’a ’na stanza ’i carcina, sutt’asteji;
’nt’o stessu lettu, tandu, soru e frati,
dormíamu ’ngrugnati com’acceji.

Chiji nottati mi ricord’a menti:
cu pátrima e cu mama eu dormía
e sorma, ch’er’ancora ’na ’nnocenti,
’nt’a naca - sup’o lettu - chi giangía.

’A naca! Cu’ s’a poti cchjú scordari!
’Mpisa j’ô lettu com’a ’na folía,
ndi tinni ’n sonnu a tutti nu’ cotrari
e, mmo, s’a penzu sentu nustargía.

Ddu’ cordi ’nt’a ddu’ bícculi ligati,
’nu saccu vecchju ch'era pe’ jettari,
ddu’ ligna pemm’i ténin’allargati
e ’na cordeja ’mpisa pe’ ’nnacari.

E mama… “Veni sonnu,” ’ndi cantava
“ven’u ti pigghji ’sta ricchizza mía!”;
tandu er’a vita nosta chi passava
e non tornava cchjú ca s’a fujía.

“E veni sonnu,” e lu sonnu venía
pe’ frátrima, ’nt’o hjuri di l’etati:
amaru, ccittu ccittu si ’ndi jía
a testa vascia, ma cu dignitati.

“E ninna, ninna, ninna voli fari,
’stu figghjoleju méu ’mu dormi voli!”…
Sta’ ccittu, ma’, e no m’aricordari
’sta vampa chi m’ajuma e chi mi doli!

 
Si permettiti, eu, vi stringi'a manu:
su' figghj'i Mara Rosa e Celestinu;
pe ccu' no' mi canusci su' Tizianu,
pe tutti l'atti sugn'u "Giandolinu".
 
Nescivi quandu catt'a Munarchìa
(anni di fami e anni di pitittu),
tandu mangiava sulu cu' nd'avìa,
cu' no, vasciav'a testa e stava ccittu.

Chiji fur'anni chi, pemm'u si campa,
a genti pe cicorji si ndi jìa
e 'a sira j'o braseri, cu 'na lampa,
cu' pettinava stuppa e ccu' cusìa.

'A guerra, pe ricordu, ndi dassava,
virgogna, povertati e villanìa,
Gejusa, tandu, 'a sira s'i curcava
cu ppani cottu e ccu 'nu piatt'i grìa.

Vi parr'i quandu Betta 'a "luppinara"
'nu figghj'e mmenz'all'annu parturìa;
'i quandu, senza scarpi, 'nt'a hjumara
'nducìa luppinu e ppòvara morìa...

'I chiji tempi, amaru, "Sasarinu"
tirandu mazzacani s'a facìa,
ca nu', si nci passàvamu vicinu,
nci cìamu d'a "fibbia e d'a currìa".

Gejusa 'i mastu Cicciu "l'umbrellaru"
ch'a fami a quart'i vinu s'a 'mbivìa;
Gejusa, 'e tempi du' "majolinaru",
scugghjandu porcejuzz'a mmenz'a via.

Anni passati me', comu fujiti,
pari ca di 'sta facci vi spagnati!
cchjù tempu pass'e cchjù strani mi siti,
e ssulu 'ju ritrattu mi dassati:

nànnima sup'a porta chi filava
e ziama j'ô tilaru chi tessìa,
pàtrima rrobbi vecchji rivotava
e mama jan'a màchina i cusìa.

Gejusa mia, ricord'i gioventuti
fujendu s'a volàu tutta l'estati;
mi trovu cu ddu' occhji 'mbecchjarruti
e cu ddu' mani tutt'arripicchjati.

Gejusa 'i quandu mama mi cantava
'i primi verzi di 'na litanìa,
cu 'jì palori 'a fami mi passava
e ppàtrima pe ssempi si 'ndi jìa;

E mi dassava, com'ereditati,
'na pinna e quattru sord'i fantasìa,
'na junta di ricordi sghjanchinati
'i 'n'omu mortu 'nt'a fotografia.
 

'U MAESTRU D'A PRIMA

'U prim'ottobri d'u quarantanovi,
(viditi vu' 'sta menti aùndi vola)
c'u grembiulinu nirgu e i scarpi novi:
pe mmia sonav'o primu jorn'i scola.

Mama mi risbigghjàv'e setti scuri
e mi 'mbuttava sutt'a funtanina:
pemm'u mi sgaja tutti 'j lordùri
'ndebb'u mi strica tutta la matina.

Hjaccàva l'ura sus'a la Matrici,
e la campana si mentì'a chjamari.
E' sent'ancor'a mama chi mi dici:
"Vattindi, Ti', cuminci'a caminari".

Cu 'nu quadernu nirgu 'mbrusciunàtu,
'n'affett'e pan'e zzuccheru 'nt'e mani,
'nu calamaru e 'n'àpissi spuntatu,
fu chija la spiranza d'u "domani".

Pàtrima no 'm mi pott'accumpagnari,
d'a manu, com'all'atti genitori:
j'a mmia 'nc'era surtantu 'i faticghàri,
no 'nc'era postu p'e problem'i cori.

Trasiv'a scola tuttu chi tremava,
parìa 'nu pujcìnu spauràtu
e, temp'u penzu aùndi mi trovava,
o' primu bancu mi vitt'assettàtu.

'Na par'i seggi vecchj sgangheràti
e 'na lavagna chi pietà facìa,
i mura lordi e tutti scarcinàti:
fu chij'a scola d'a simenza mia!

Ma 'u cori veramenti mi sartàu
appena vitt'a d'iju... chi trasìa:
a testa arta 'a cattedra 'nchjanàu
e fu 'u maestr'i tutt'a vita mia.

'Na cerza d'omu chi bontà spandìa
e chi parìa 'na gurna di sapienza,
fu 'spirazioni di 'na poesia
'a sula rrama chi facìa simenza.

Ddo 'n Giugliu, patri di la gioventuti,
quanti ricordi vu' no ‘m mi dassati!
Restaru, l'anni me', tutti schjumpùti
e vvu' coraggiu cchjù no 'm mi 'ndi dati.

Maestru, quandu jìstiv'a lavagna
'u 'ndi spiegat'a "scienza" d'i vocali,
facìstivu 'stu cori 'm'u si spagna
pe 'j palori chi spandìanu sali.

Ddo 'n Giugliu, po' venistivu j'a mmia
'u v'assettati propi'u cantu meu,
no 'n sacciu si ffu gioia o fu 'llegria,
no 'n sacciu mancu chi provavi eu.

E sacciu sulamenti ca sentivi
'a manu vosta c'acchjappav'a mia:
appress'a vvu', maestru me', scrivivi
i primi asti di la vita mia.

'Nt'e mani vosti eu m'addormentavi
ch'i primi sonni di la cotrarànza,
'nt'a chij mani, Giugliu meu, posavi
i primi delusioni e la spiranza.

Sunnu tant'anni, mo, chi vvu' mancati,
finistiv'i 'mparari li cotràri,
paci e riposu sempi 'm'u trovati,
dassatimìll'i mmia li cos'amari!

Dassatimìlli'e vviti ca m'i 'mparu
e ppo' j'a fossa vegn'e vv'i ripetu,
ca vogghj'u su' pe vvu' sempi scolaru
e m'u m'illudu ca tornamm'arrètu.

Maestru meu d'a prim'elementari,
mo chi crisciv'e diventavi «'ncunu»,
p'e voti chi vi fici amarijàri,
v'abbas'i mani e vvi cercu perdunu!

'A LÍTTARA Ô SIGNURI

Dopu ‘na vita sozza di suduri
e chin’a curma di malincunìa,
ti scrivu chista littara, Signuri,
pecchì vogghj’u discurru, mo, cu ttia.

Non vegnu ‘m’u ti cuntu ca patìvi
e mancu ca perdiv’a gioventù,
ma ciangiu sul'i figghj chi criscìvi
e ca, pe d’ij, orma' no 'n servu cchjù.

M'abbandunàru cca, com'a 'nu cani
riccu d'etàti e ppòvar'i giudiziu,
a un'a unu si lavar'i mani
e mi dassàr'u 'mpurru 'nt'a 'stu 'spiziu.

Signuri chi 'sta cruci mi mandàsti
pemm'u penìju 'nt'a vecchjaia mia,
pecchì quand'a mmugghjèrima chjamàsti
no 'n ti nejàst'u chjami pur'a mmia?

A chi mi serv'u camp'i 'sta manera,
senza 'n'aiutu e mancu 'nu cumportu!
'Stu 'spizi'è ppej'ancora d'a galera:
cu' trasi ccan'an'inta nesci mortu.

Cca 'nc'è cu' parra d'amur'e ddi guerra,
'nc'esti cu' ciangi e ppuru cu' jestìma,
cu', pemm'u campa, 'bbasarrìa j'a' 'nterra
e 'nc'è cu' prega pemm'u mori prima.

Arràssu centu migghja 'i 'sti rovìni
e liberandi 's Domin'i 'sti peni!
p'a giuventùti 'nc'enn'i medicini,
ma p'a vecchjaia nenti 'nc'è chi tteni.

Cunchjùd'e, mmo, ti cercu scusa eu
si criticàv'i cosi chi ffacìsti,
ma 'u fattu è ca Tu, Signuri meu,
crijàst'u mundu e ppo' ti 'ndi futtìsti.
 
 

'U PRIM'AMURI

Hjuri d’amur’e hjur’i gioventuti,
passavi rivigghjanti li nottati
scrivendu littareji scunchjuduti,
penzandu sul’a ttía, hjuri d’estati.


Ti vitt’a nnompenzata, ’ja matina,
quandu p’a prima vota ti ’ncuntravi;
fu com’a pungitura di ’na spina
ca, po’, tutta 'a jornata ti penzavi.

"Cu’ sapi s’esti zzita?" mi dicía,
"Cu’ sapi si ’nci piaciu puru éu?
Non sacciu mancu éu chi pagarría
pemm’ija ’u poti star’ô cantu méu!"

Tra ’nu suspir’e ’nn’attu m’accorgía
ca tutt’a vita mía cangiava strata:
’u jornu semp’i novu mi vestía,
pemmu mi vidi tu, s’er’affacciata.

C’a testa ’mbrosicat’i brillantina,
sciancandu rrobi sup’a bricichetta,
tu fusti lu penzeru d’ ’a matina,
tu fusti, amuri, ’a prima sicaretta.

Po’ vinn’u picciu ca volía ’u ti parru,
ma, mi sa’ diri tu, comu facía,
si ’a virgogna mi dunava ’mbarru
e lla cacazza... a centuvinti jía?

Volía pemmu ti mandu ’na ’mbasciata,
ma, po’, non m’aricordu comu fu,
c’a scusa ca volía u mi parra frata,
’nu bellu jornu mi fermasti tu.

Appena l’occhji i ’ncoju m’appojasti
e, appena chiji labbra tu movisti,
’u sangu e lu penzeru m’u ’nghjelasti,
e ’mpasimat’u restu mi facisti.

E ô prim’appuntamentu chi ’ndi damma,
‘nt’a ’ju catoju vecchju ’nt’a “Cafía”,
appena, prim’amuri, ’nd’abbrazzamma,
’u megghju jornu fu d’ ’a vita mía!

"Ti vogghju ben’e non ti dassu mai!"
E ’a stessa cosa mi dicisti tu.
P’a ’Mérica ’ndavist’u ti ’ndi vai
e dopp’i tandu non ti vitti cchjú.

Passaru l’anni comu fussi nenti,
finiru li franeji ’i giuventú;
mi maritavi e misi sentimenti,
ma ’u prim’amuri resti sempi tu!

 


 

ANNI D'A VITA MIA

Anni d'a vita mia comu fujiti,
pari ca d'a vecchjaia vi spagnati,
cchjù tempu pass'e cchjù prescia nd'aviti
e mancu 'nu minutu vi fermati.

Fùstivu com'u suli quandu mori
e, a d'una a d'una, stuta li jornati,
fùstivu la scurata di 'stu cori:
finìu lu 'mbernu e si ndi jìu la 'stati.

A' 'nita nu' passamma, spenzerati,
i megghju tempi di la gioventù;
mo chi 'mbecchjàvi sulu mi dassati,
jiti fujendu e non v'arrivu cchjù.

Ma prim'u chjudu l'occhji e' vi spiju, -
ca 'nu disìju randi nd'avarrìa -
si vu' m'accumpagnati pemmu viju,
tutt'i pedati di 'sta vita mia!

Vorrìa si vu', d'a manu, mi portati
aùndi senza scarpi mi criscivi,
vorrìa si 'nzem'a mmia v'aricordati
'a fami e li doluri chi pativi.

Pàtrima, tandu, - 'nt'a 'sta menti mia,
pari ca mo u viju strati strati –
d'i festi cu 'na bricichetta jìa
vindendu rrobbi e vestimenti usati.

E mama pemm'u faci scola jìa
girandu pe paisi e pe cuntrati
- Fabrizia… Guardavalli – ed eu a seguìa
ricogghjendu ricordi e povertati.

Tandu 'nt'e casi 'o scuru si stacìa,
appuramenti a lluci di lumera,
pe' d'erbi senza scarpi a genti jìa
cà truscia pe mangiari tandu nc'era.

'Nt'a quattru mura 'i jìbussu e carcina,
ch'asteji menzi rutt'e annirghicati,
d'a panza 'i mama tandu 'na mammina
scippav'a mmia cu tutt'i diricati.

Vinni, accussì, pe mmìa la prim'etati,
e vvìnnaru li primi sentimenti,
fujend'appress'i gatti 'nt'a 'jì strati,
criscìvi, ccittu ccittu, ammenz'a genti.

Passaru sessant'anni d'int'e mía,
si ndi jiru spiranzi e primaveri,
non sacciu quantu sordi pagarría
pemmu domani fussi com'aéri.

Ma 'u tempu non si poti cchjù fermari
ca fuji comu fussi currijatu;
ndi detti, sì, benesser'e ddinari,
ma è beru ca cu nnu' fu sempi 'ngratu.

A mmia, tantu pe' ddiri, mi dassàu
'nu foccu appiccicatu chi m'ajuma,
cà, pe' spurtuna, 'i d'inta mi posàu
'nu crancu chi mi doli e mi cunsuma.

Mi votu e vij'a vita 'n luntananza
chi trema, chi s'a fuji e chi scumpari:
puru ca moru, moru c'a spiranza
ca ncun'i mìa si pot'aricordari.






tiziano.rossi@libero.it

ATTENZIONE !!   I TESTI DEL SITO SONO PROTETTI DA DIRITTO D'AUTORE.
 
 Qualunque utilizzo dovrà essere espressamente autorizzato
 dall'autore o dall'ente che ne tutela i diritti.
 Ogni abuso sarà perseguito a norma di Legge (L. 633/41 e s. m.)